TURA: Meghalaya a·doko aro mongsongbate Garo Hills-o ding·ani batroroengani gimin skulo poraienggipa bi·sarangni naljokgnina Meghalaya sorkarini ning·o donggipa School Education & Literacy-ni Director Swapnil Tembe, dingtangmancha niamrangko donataha.
Ia sal somoirango ding·anirang batroroengani gimin da·o dipet skulrango a·palni kamrangko ba kal·susaanirangko ong·atkujachina gita u·iataha.
Chatro chatrirang skulo ong·engon, be·en ran·sisie sajana gita chirangko chu·onga gita ringatchinaba sorkari didiataha. Chatro chatrirang iandake be·en ran·sisigenchimode ORS ba kakji bitchirangko on·china gitaba ua didiataha. Chatro chatrirang pilakkon chi bottle-rangko ra·e skulchi re·atchina gitaba sorkari u·iataha.
Skulo aro mongsongbate salni 12:00 bajioni 3:00 bajiona sal nangao bi·sarangko dongatjachina aro chatro chatrirang skulchi re·engon, tupi ba chattarangko ra·e re·atchina gitaba sorkari u·iataha.
Skul ning·o ba skul sambao chatro chatrirangko ja·rara re·na on·jachina gitaba ua didiataha.
Chatro chatrirang bilonge be·en ran·sisigenchimode ta·raken sepangbatgipa hospital ba sanchakram biaprangona rimangchina gitaba School Education & Literacy-ni Director u·iataha.
