TURA: Batanggimin sal somoirango mikkarang wajae Garo Hills gimikon chaktopilgija ding·aniko chakna nangtokahaoba, da·o mikkarang wabaani ja·man manderang dongtoaniko man·piltaiaha.
Garo Hills-ni mitam biaprangode re·anggipa antini a·bachengaonin mikkarang wana a·bachengaha aro mitam biaprangoba Sonibar walonin mikkarang wana a·bachenge Robibar pringode bang·bata biaprangon manderang ka·singipa balwarangko man·piltaiaha.
Re·anggipa antini a·bachengachibara Garo Hills gimikon chaktopilgija ding·anirangko chakna nangahani gimin salo ka·enggipa skulrangkode chutti wattokpilahachim aro office-rango kam ka·ani somoirangkoba adita dingtangatna tik ka·angahachim.
Tura jillaoba re·anggipa anti gimik chaktopilgija ding·aniko manderang chakna nangtokahaoba, Sukrobar attamonin ka·singipa balwarang balbae, dongtoaniko man·na a·bachengaha aro Sonibar attamode mikkarang wabae, Robibar salode salgimikan ka·sinaniko man·angpiltaiaha.
