TURA: South Garo Hills a·jao Dimapara-oni Nongalbibra-ona dakanggipa National Highway (NH-62) rama namsrangjaengahani a·sel ia ramako re·ruraenggipa aro jolo songdongenggipa manderang neng·nikanirangko chagrongna nangtokengaha ine Association for Democracy & Empowerment (ADE) Gasuapara regional unit parakatenba, ia ramako ta·raken tarichina a·dok sorkariko didiataha.
ADE Gasuapara regional unit-ni president Callynecan Ch Sangma-ni parakatani gitade, Dimapara-oni Nongalbibra-ona dakanggipa NH-62 ramao, Cherengpara-oni Jaksongram aro Masighat-oni Rongsa Awe-ona dakanggipa bakrangde da·o obosta namjabatsrangahani a·sel ia ramako re·ruraenggipa manderang aro jolo songdongenggipa manderangba neng·nikanirangko chagrongna nangtokengahachim.
“Ia rama gita manderangsan re·ruraenga ong·ja indiba koelarangkoba salruraengani gimin ia ramako ta·raken taripile on·na nangengaha,” ine Sangma parakataha.
Ia ramako taripile on·kujaskal uamangni dabianiko dontongjawa ineba ADE Gasuapara regional unit-ni president parakataha.
