SHILLONG: Meghalaya a·doko donggipa karkanarang pilakan bijolichi chalaienggiparangsa ong·ani gimin da·o gita load shedding ba bijoliko ru·uta somoirangna kimitangkua ong·ode a·doko donggipa karkanarangko chiptoknaba dongaha aro unode a·dokni kajina man·anio nangchakeaniko man·gnok ine Gambegre-ni MLA Saleng A Sangma, a·dok sorkarina mikrakataniko on·angaha.
Iani bidingo kobor ra·timgipa manderang baksa agangrikengon, a·doko bang·a manderangan aro karkanarangba bijoliosa pangchake kamrangko ka·tokenga aro a·doko bijoli kimitaniko dontongna man·jagenchim ong·ode a·dokni karkanarangko chiptokna nangnaba donga ine Saleng, suk ong·gijaniko parakataha.
Sangma-ni parakatani gitade, a·doko bijoliko indita kontarangna kimitenganiara manderangni janggi tangani bewalkosan ong·aigija a·dokni economy-naba nangchakeaniko ra·baengachim.
Dingtang dingtang porikkarangko sena tarisoenggipa chatro chatrirangba a·doko bijoliko ru·uta somoirangna kimitengani a·sel neng·nikanirangko man·na nangtokenga ineba Sangma parakataha.
“An·chingni hospital-rangoba sanna bananirangko on·enggiparang aro sanna bananirangko ra·enggipa manderang neng·nikanirangko chagrongna nangtokenga. Da·o gita ding·pretengmiting somoio bijoliko kimitaniara manden namen dongtogijanikoba ra·baa,” ine Sangma aganaha.
Meghalaya a·doktangni bijoli bikotgipa unit-rang kam ka·jaengani a·sel ia sal somoirango salprakon konta 10 ong·pile bijoliko kimitna nangao ga·akengachim ine nikna man·a.
