SHILLONG: Meghalaya a·doko National People’s Party (NPP) dolan sorkariko dilenga aro Sohiong constituency-ni manderangba NPP dolan namroro silroroaniko ra·bana man·gen ine ma·sitokengani gimin re·baenggipa May 10 tariko ong·atenggipa Sohiong Assembly election-o Sohiong constituency-ni manderang, NPP-ni candidate-kon seokgen ine Mongolbar salo, a·dokni Chief Minister aro NPP-ni national president Conrad K Sangma, an·tangni ka·dongchakenganiko parakataha.
“Chinga Sohiong jolrango rakbee kamrangko ka·enga aro ia election-o manderangni chakpaanirangko man·gen ine chinga ka·dongenga. Dingtang dingtang political dolni dilgiparang sorkariko nikmanaha aro NPP dolan sorkariko dilengani gimin manderang, NPP-kon seokgen,” ine Chief Minister parakataha.
Sohiong Assembly election-ko re·baenggipa May 10 tariko ong·atna siengachim aro 2018 bilsini Assembly election-o Sohiong Constituency-ni MLA-na seokako man·gipa Samlin Malngiang-an ia changoba NPP-ni candidate ong·e susaengachim ine nikna man·a. 2018 bilsini Assembly election-o Malngiang, 600-na batgipa vote-rangchi cheahachim.
Ia chang Sohiong Assembly election-na NPP-ni tarisamsoani gimin kobor ra·timgiparangna talatangengon, “NPP dolan a·dok sorkariko chalaiengani gimin Sohiong constituency-ni manderangba sorkariko chalaienggipa dolkon namnikbattokenga. NPP-ni candidate-ko seokgenchimode Sohiong constituency-ba bang·en namgnirangko man·gen ine manderang ma·sienga, uni gimin ia pilakko nigopen chinga ia election-o chegipa ong·na ka·dongenga,” ine Sangma aganaha.
May-ni 10 tariko ong·atenggipa Sohiong Assembly constituency-ni election-o gipin political dolni candidate-rangko seokede maming namgnirangko man·jawa aro National People’s Party (NPP)-sa sorkariko dilengani gimin, NPP-ni candidate-ko seokgenchimosa constituency-ni manderang dingtanganiko nikna man·gen ine Sombar saloba, a·dokni Chief Minister aro NPP-ni national president Conrad K Sangma, Sohiong constituency-o NPP-ni candidate Samlin Malngiang-na campaign ka·angengmiting somoio aganahachim.
