SHILLONG: Meghalaya a·doko aro mongsongbate Garo Hills-o konta 10-na bijoliko kimitengani a·sel manderang neng·nikanirangko chagrongna nangtokengahaoba da·o dipet a·dok sorkari, bijoli kimitaniko dontongna maming cholrang dongkujanaba gnang.
Iani bidingo kobor ra·timgipa manderang baksa agangrikengon, ia bilsio cholrang dongteljaengani gimin iandake bijoliko kimitna nangao ga·akenga aro a·doko election-ko ong·atani a·sel pangna bilsi dakronga gita January jaoni April jaona load shedding ba bijoli kimitaniko pripraate dakna man·jaha ine Mongolbar salo, a·dokni Chief Minister Conrad Sangma parakataha.
“Iani a·selan ia gimikni bojako da·osa an·ching nikskana nangenga,” ine Sangma aganenba, ia sal somoirango a·song gimikon bijolini gita neng·nikanirangko chagrongna nangtokenga aro MeECL-ba tangka paisani gita neng·nikanirangko chagrongna nangenga ine parakataha.
Ia bilsiode MeECL-o bang·en dingtanganirangko nikna sienga ine janapatengon, a·doko chu·onga gita mikkarang waahaosa ba da·o dipet a·song gimikon bijoli chu·ongjae damrang rakdugaengani gimin bijoliko komikala damrango brena man·ahaosa a·doko ia neng·nikaniko namatna man·aignok ine Chief Minister parakataha.
Manderangni neng·nikanirangko namatna gita sorkari jotton ka·enga ine a·dokni manderangko chakchikkuchina mol·molatengon, iani ja·manode iandakgipa obostako chagrongtaijana sorkari ka·dongenga ine Chief Minister parakataha.
“Ian manderangni neng·nikaniko man·batenggipa somoirangoni mingsa ong·genchimoba re·baenggipa bilsi aro jarangode ia jao gita neng·nikanirangko chagrongna nangtaijawaha maina chinga bang·en kamrangko ka·engaha,” ine Sangma ku·rachakaniko on·angaha.
Meghalaya a·doko bijolirang chu·ongjaengani a·sel jasa batpilen ru·uta somoirangna bijoliko kimitna nangengani gimin manderang neng·nikanirangko chagrongna nangtokengahachim ine nikna man·a.
