SHILLONG: Meghalaya a·doko karkanarangko chalaiani bewal aro sorkarini gita maiba dakchakanirangko on·na nangengama nangjaenga, uko nina gita Budbar salo, Meghalaya Industrial Development Corporation (MIDC)-ni chairman James Sangma, Umiam Industrial Estate-ona re·ange nieaha.
Ia karkanarangko nieani ja·man kobor ra·timgipa manderang baksa agangrikengon, ia karkanarangko chalaianirang da·o dipet namaienga indiba ia karkanarangna nokrangko, ramarangko, bijolirangko aro chirangko nambate on·na nangenga ine Sangma parakataha.
“Karkanarangko name chalaina gitade iandakgipa cholrangko name man·na nanga aro ia karkanarango nangenggipa cholrangko ta·raken on·na nangenga,” ine Sangma aganaha.
Nanga gita dakchakanirangko man·genchimode Umiam Industrial Estate, kamrangko nambate ka·na man·gen aro a·dokni namroro silroroanina bang·en on·gilna man·gen ineba MIDC-ni chairman parakataha.
