SHILLONG: Sukrobar salo, People’s Democratic Front (PDF)-ni general conference-ko ong·atangenba, National People’s Party (NPP) baksa bakrimna manchianiko ra·chakangaha.
Iani bidingo kobor ra·timgiparangna talatangengon, PDF-ni dilgiparang, Sonibar attamni 4:00 bajimango NPP baksa bakrimna soi ka·grikanggen ine PDF-ni president Gavin Miguel Mylliem parakataha.
PDF-ni NPP baksa bakrimanio PDF-ni president Mylliem aro NPP-ni national president Conrad K Sangma-ni gisepo soi ka·grikanggen aro ia tom·ani PDF-ni dilgiparangko aro membor-rangko NPP-o rimnapjolanggen.
PDF-ni dilgiparang NPP baksa bakrimgenchimoba da·o dipet PDF-ko bon·atstangade ong·kujaenga ineba Mylliem talataniko on·angaha.
NPP-chi dilenggipa MDA 2.0 Cabinet-o PDF-ni MLA-rangba biapko man·genma ine sing·on, da·o dipet PDF-ni MLA-rangna Cabinet-ni biapko tikatani giminde agangrika dongkuja ine PDF-ni president parakataha.
Indake ong·engon, koborko man·soani gitade, PDF-ni MLA sakgniko department ge·gnio advisor dake songskanaba gnang.
Da·o dipet PDF-o MLA sakgni donga aro NPP-o sak 26 MLA-rang dongahani gimin PDF-ni MLA sakgniba NPP-o napahaode gimik sak 28 MLA-rang ong·e, doltangari sorkariko rikna gita sakgittam MLA-kosan nangaignokchim.
