U·IATTIMGIPAONI
TURA: South West Garo Hills a·jani Zikzak jolo tarigipa PMGSY ramako matchote tarija ine Garoland State Movement Committee (GSMC) Zikzak unit matnangatenba, iani bidingo kakketko ma·sina gita uamang Right To Information (RTI) Act-ni ning·o am·sandigen ine parakataha.
GSMC Zikzak unit-ni general secretary Dichon Ch Marak-ni parakatani gitade, ia ramako Zikzak Block-ni ning·o Domapara gita Aningpara-oni Katuli-ona dakanggipa km 12-ni rama ong·achim aro ia ramako ru·uta bilsirangonin matchotgija galchipahani gimin GSMC-ni membor-rang, ia ramako tariani bidingo RTI ka·e am·sandianirangko dakna sienga.
“Ia ramako matchotgija galchipaniara sorkarini tangka paisarangko jakkalsretanisan ong·aigija songni nokni manderangko cha·bokani gitaba ong·enga. Uni gimin ia ramako tariani bidingo kakketko ma·sina gita RTI-ko ka·anggen aro kakketko ma·siani ja·man dos donggipa contractor-rangni kosako nanga gita ja·kurangko de·anggen,” ine GSMC Zikzak unit-ni general secretary parakataha.
