SHILLONG: Right to Information (RTI) Act 2005-ni bidingo chatro chatrirangna agan-talate on·na gita North Eastern Hill University (NEHU)-ni ning·o donggipa Law Department, NEHU-ni Pro Bono Associate Club baksa nangrime dingtangmancha awareness program-ko ong·atangaha.
Ia program-ko ong·atanio Central Information Commission-ni Chief Information Commissioner (CIC) YK Sinha, chatro chatrirangna aganprakangengon, RTI-ko ra·gatanichi maikai manderangna namgniko ra·baaha, uarangni gimin agan-talate on·angaha.
Manderangna dangdike on·anio maikai ia RTI Act-ara, sorkari officer-rangko kakketo kam ka·china didiahachim, uarangni giminba Sinha janapangaha.
Indake ong·genchimoba mitam manderang ia Act ba niamko jakkalsretengani gimin iandake jakkalsretaniko champengna nangenga ine Sinha aganaha.
Ia program-ko ong·atanio, State Chief Information Commissioner Heimonlang Nongpluh-ba jinmana aganprakangengon, RTI Act-chi manderangni ma·sina nanganirangko ma·sie ra·na man·a ine chatro chatrirangko pangnan nangan somoirango RTI-ko jakkalchina didianiko on·angaha.
Ia tom·anio NEHU-ni Vice Chancellor Prabha Shankar Shukla-ba jinmana aganprakangengon, an·tangtangna on·gimin bilrangni gimin u·i-ma·sipagijagipa songni nokni manderangna iandakgipa niamrangni gimin agan-skie on·china gita chatro chatrirangko didiangskaaha.
