SHILLONG: Re·baenggipa Sukrobar salo a·dok sorkari, pilak political dolrang baksa state reservation policy aro roster system-ni bidingo tom·e chanchirimna siengon, sorkarini talate on·anio chu·ongnikjagenchimode bilakbate jingjengatanirangko dakna Voice of the People’s Party (VPP) mikrakataniko on·angaha.
Roster system-ko ra·gatkujaskal pilak department-rangon kam on·aniko dontongkuchina dabiani bidingo MDA 2.0 sorkari maming aganchakaniko on·jaengani gimin Budbar salo VPP-ni membor-rang, Additional Secretariat sambao donggipa parking lot-o asonge jingjengatangaha aro ia asonge jingjengatanio VPP-ni president Ardent Miller Basaiwmoit, kobor ra·timgipa manderang baksa agangrikengon, reservation policy-ko nipiltaiani gri roster system-ko ra·gatgenchimode Khasi-Jaintia Hills-ni chadamberangsa noksan ong·nagiparang ong·enga ine parakataha.
Sukrobar saloba jolni manderangko Additional Secretariat sambao donggipa parking lot-ona re·bae, political dolrangni tom·e chanchirimanina sengchina gita ua didiataha.
“Sorkarini ku·rachakanio chinga kusi ong·jagenchimode chingni jingjengatanirangko chinga bilakbatatgen. Reservation policy-ko nipiltaichina chinga nangnikenga,” ine VPP-ni president aganaha.
Basaiawmoit-ni parakatani gitade, reservation policy-ni a·selan chadamberang kamgri ong·e dongna nangtokenga aro roster system-ko ra·gatahaode ia obostako namjabatatgnokchim.
“Uni gimin pilaknan apsan bak rengsi ong·nagipa reservation policy-kosa chingna nangenga. India a·song gimikon mandeni jelbra jelsuanio pangchakesa reservation policy-ko ja·rikenga. Uni gimin reservation policy-ko nipiltaichina chingni dabianiko bilakbatatna chinga May-ni 19 tariko apsan tom·chimongtaina tik ka·aha,” ine Basaiawmoit aganaha.
Roster system aro reservation policy-o neng·nikanirangko chu·gimik matchotkujaskal dingtang dingtang department-rangni kamo ra·aniko dontongna gita sorkari ta·raken ja·kuko de·na nanga ineba VPP-ni president dabiangaha.
Mandeni jelbra jelsuanio pangchake Khasi-Jaintia-rangna 40%, Garorangna 40% aro gipinrangna 20%-ko kanganiara kragijani ong·enga ine janapatengon, 1971 bilsio Khasirangni jelbra jelsuaniara 4,57,064 ong·achim aro ua apsan somoio Garorangni jelbra jelsuaniara 3,20,613 ong·achim ine Basaiawmoit parakataha.
“Iako percentage-ona ra·bagenchimode Khasi-Jaintiarang 45% aro Garorang 30%-san ong·enga,” ine VPP president parakataha.
