SHILLONG: National People’s Party (NPP)-ni dilanichi Meghalaya Democratic Alliance (MDA) 2.0 sorkariko rikaoni da·o jagni ata ong·pilahaoba, Meghalaya Assembly-o Opposition dolni dilgipako seokkujaengani gimin Meghalaya a·dokni All India Trinamool Congress (AITC) suk ong·gijaniko parakataha.
AITC-ni state vice president George B Lyngdoh-ni parakatani gitade, State Security Commission-o Opposition dolni dilgipakoba membor dake donna nangachim indiba da·onan Opposition dolni dilgipako seokkujaengani gimin Security Commission-na Opposition doloniko membor songna man·kujaenga.
“State Security Commission-o Opposition dolni dilgipako membor songna nangengachim indiba a·doko gital sorkariko rikchengaoni da·o jagni ata ong·pilengahaoba a·dok sorkari, Opposition dolni dilgipako seokkujaenga. Iako MDA sorkari, Speaker-ni office baksa nangrimenba miksongmanchaen dakengama ukode name ma·sijaha. Indide State Security Commission-o Opposition doloni sawa membor ong·gen?” ine Lyngdoh sing·doataha.
AITC-ni state vice president George B Lyngdoh-ni parakatani gitade, Opposition dolni dilgipa, Assembly-o an·tangni kamrang baksana dingtang dingtang committee-rangoba Opposition dolni pal dongpana nangao ga·akrongachim.
“Da·o jagni atani ja·manoba sorkari, Opposition dolni dilgipako seoke on·kujaenganiara Assembly-o Opposition dilgipani kamko ja·donggaatan baksana dingtang dingtang kamrangoba champengata gita ong·enga,” ine Lyngdoh aganaha.
Opposition dolni dilgipa griba State Security Commission-ni tom·anirangko ong·atna man·aigenma ine sing·doatengon, “Opposition dilgipani kamara opposition dolni bench-osan ong·aija indiba dingtang dingtang nangchongmotgipa kamrangoba ong·achim. Opposition dolni dilgipaan, sorkarini bak ong·pagijagipa manderangni ku·rang gitaba kamko ka·gipa ong·achim,” ine Lyngdoh parakataha.
“Ia pilak kamrangan da·o ja·donggaatako man·na nangengaha indiba sorkari, Opposition dolni dilgipako seokani bidingo maming gisik nange mesokanian dongjaenga,” ine ua aganaha.
