SHILLONG: Batanggimin bilsirango Meghalaya sorkari, a·doko tom·tomaniko rakkina gita niam retirangko nirok sandianirang dongjahani a·sel da·oba a·doko bobil dake chakatgipa dolrangko bikottaina jotton ka·engaha ine Robibar salo, a·dokni Opposition AITC dol suk ong·gijaniko parakataha.
“Batanggimin bilsi bongani gisepo ia sorkari, niam retirangko nirokanio maming gisik nange mesokani dongjaha aro iani a·selan a·doko bang·en so·sojengjeng ong·anirangko nikna man·aha aro ian bobil dake chakatgipa manderangko ong·kattaina cholrangko on·ani gita ong·enga,” ine AITC-ni state vice president George B Lyngdoh parakataha.
Garo Hills-o GNLA bobil dol ong·kattaina jotton ka·enga ine am·sandianirangko dakchina Police-rangni seatgipa chittini leak ong·gipani bidingo AITC-ni dilgipa ia kattarangko aganaha.
“Ua somoio tom·tom ong·gimin a·dokkosa MDA sorkarina pakwate on·ahachim indiba ia sorkarini ning·o bang·en kam ka·sretani aro tangka paisa jakkalsretanirangko nikna man·aha. Iandakgipa kamrangan a·dokni chadamberangko ka·donga gri ong·attaiengaha aro chadamberangko ong·gija ramarangona, pekgipa bosturangko jakkalaniona aro uandakgipa kamrangona sokatna siengaha,” ine Lyngdoh aganaha.
Meghalaya a·doko niam gri pekatgipa sam badinganirang, simarango niam gri bading chiwalgrikanirang aro uandakgipa kamrangko bang·en nikna man·aha aro da·o bobil dake chakatanikoba a·doko niktaina siengaha ineba Lyngdoh, suk ong·gijaniko parakataha.
“Ia pilakan sorkariko chalaianio chu·sokgijani aro police officer-rangko kam ra·jitrongani a·selba ong·enga. Sorkarini kamrango manderang kusi ong·jagenchimode pangnan a·doko so·sojengjeng ong·aniko nikna man·aigen,” ine Lyngdoh parakataha.
