SHILLONG: Roster system aro Job Reservation Policy-ni giminba chanchirimna gita a·dok sorkari, pilak political dolrangni committee-ko songpiltaie on·angaha.
Jasani gisepon report-ko on·china gitaba sorkari, ia committee-na ge·etaniko on·angaha.
Roster system-ni bidingo chanchirimna gita sorkarini songe on·gipa committee-na reservation policy-ni giminba chanchirimna gita bilko on·china sorkario bi·ani ja·man ia gital committee-ko songe on·angaha.
Roster system-ni bidingo chanchirimna songe on·gipa committee-o Voice of the People’s Party (VPP)-ni president Ardent Miller Basaiawmoit-koba membor ong·china sorkari tik ka·ahaoba ua ia committee-o membor ong·na gita jechakskaaha aro uandaken job reservation policy-ko gital dake nipiltaichina dabie okumu chake jingjengatengachim.
Reservation policy-ni giminba chanchirimna gita committee-ko songpiltaiahani gimin ia committee-ni chairperson aro a·dokni Cabinet Minister Ampareen Lyngdoh, kobor ra·timgiparangna talate on·angengon, roster system-ni gimin chanchirimna songe on·gipa committee-na da·o sorkari, reservation policy-ko gital dake nipiltaiani giminba chanchirimna gita bilko on·aha ine parakataha.
Ia gital committee-o political dol ge·antionikon membor sakgniko rimdapchina gita sorkari ge·etaha ineba Lyngdoh parakataha.
“Roster system aro reservation policy-ni bidingo chanchirimanio Meghalaya a·doko songdongenggipa pilak Tribal jatrangkon bak ong·atna gita political dol ge·antikon bak ong·china sorkari tik ka·aha,” ine Lyngdoh aganenba, ia committee-ni tom·aniko Budbar salni 2:30 bajio ong·atengani gimin VPP-ko man·chape pilak political dolrangkon bak ra·china gita didiataha.
Ia committee-o pilak political dolrangan bak ra·genchimode a·doko songdongenggipa pilak jatrangni nangnikani gita apsan chanchirime ja·kuko de·angna man·gen ineba committee-ni chairperson parakataha.
A·dokni Chief Secretary DP Wahlang-ni u·iatani gitade, ia sak 12 membor-rang donggipa committee-ko a·dokni Law Minister Ampareen Lyngdoh dilanggen aro ia committee-o membor ong·na gita seokako man·gipa manderangara, AITC-ni Zenith M Sangma, BJP-ni HM Shangpliang, GNC-ni Augustine R Marak, HSPDP-ni KP Pangniang, INC-ni Ronnie V Lyngdoh, KHNAM-ni Pyndapborthiaw Sabon, NPP-ni Dr W Kharlukhi, UDP-ni Renikton Lyngdoh Tongkhar, VPP-ni Ardent Miller Basaiawmoit, a·dokni Chief Secretary DP Wahlang aro Personnel & AR (B)-ni Commissioner & Secretary membor secretary ong·angskagen.