SHILLONG: Meghalaya a·dokni Chief Electoral Officer (CEO) Frederick Roy Kharkongor-na dongimin somoi bon·ahani gimin sakgipin IAS officer BDR Tiwari-ko da·o a·dokni gital CEO songskaaha.
Gital CEO-na songako man·gipa Tiwari, Meghalaya sorkarini Joint Secretary ong·e kamko ka·engachim aro uko re·anggipa May 18 tarikon a·dokni gital CEO-na sorkari parakataha.
Kamtangko watangenggipa CEO Kharkongor, 2016 bilsioni 2023 bilsiona CEO ong·e kamko ka·angaha aro uni CEO ong·engmiting somoio election-ni kamrangna ua bang·a namgnirangko ra·baahachim.
Kharkongor, uni CEO ong·miting somoio Meghalaya Assembly election-ko changgni aro General Parliamentary election-ko changsa nirokangaha.
