Garo Hills-ni dingtang dingtang biaprango World Environment Day-ko manianga

TURA/WILLIAMNAGAR: Pangna bilsi manirongbaenga gitan June-ni 5 tariko, Garo Hills-ni dingtang dingtang biaprangoba World Environment Day-ko maniangtaiaha aro ia salko maniani bak gita bang·bata biaprangon bolrangko ge·an baksa samtangtango donggipa biaprangko rongtalatangtokaha.
East Garo Hills a·jao ia World Environment Day-ko Soil & Water Conservation department-ni gita Mandalgre songo manidilangaha aro ia salko manianio a·dokni Soil & Water Conservation Minister Marcuise N Marak, mongsonggipa sokgipa ong·e bakko ra·angaha.
Ia salko manianio a·dokni Soil & Water Conservation Minister, jinmana aganprakangengon, Mandalgre songni Simsang chibisiko a·bachengatgipa Sloping Agricultural Technology (SALT)-ni gimin talataniko on·angenba, a·ba o·e cha·aniko dontonge, bite nanggipa bolrangko ge·anichi an·tangtangna dingtang janggi tangani cholrangko sandichina songni nokni manderangko didiangaha.
Durama a·briko ripinge rakkianichi, chiring chibisikrangni tipanganiko chel·chakchina aro buring bolgrimrangko ripinge rakkiangchina gitaba ua, jolo songdongenggipa manderangko didiangaha.
Mandalgre songo ia World Environment Day-ko manianio dongpae bak ra·anggipa gipin manderangara, Soil & Water Conservation department-ni Commissioner & Secretary Joram Beda, East Garo Hills a·jani Deputy Commissioner Vibhor Aggarwal, Williamnagar Division-ni Divisional Soil & Water Conservation Officer Corbeth Homa D Sangma aro gipinrang ong·a.
Indake ong·engon, ia World Environment Day-ko East Garo Hills Krishi Vigyan Kendra (KVK)-ni gitaba Agricultural Management Technology Agency (ATMA) baksa nangrime Megagre-o donggipa KVK office-o maniangaha aro ia manianio dingtang dingtang songrangoni gimik sak 86 manderang bakko ra·angtokaha.
Ia salko manianio East Garo Hills KVK-ni Senior Scientist aro Head, Dr Brijendra Singh, rimchaksoani kattarangko aganangengon, ia salko maniani bidingo songni nokni manderangna talate on·angjolaha.
Ia program-ko ong·atanio NABARD-ni DDM Dr Ksh Sobita Devi, mongsonggipa sokgipa ong·e jinmana aganprakangengon, samtangtango ong·telaigiparangko ripinge rakkichina, jabolrangko skatang galjachina aro plastic-rangko jakkalchina, songni nokni manderangko didiangaha.
Ia program-ko ong·atanio dongpae jinmana agan-talate on·anggipa gipin manderangara, ATMA-ni Project Director Tengman N Sangma, ICDS-ni DPO Silje Sangma aro gipinrang ong·a.
Apsan daken, ia World Environment Day-ko Meghalaya a·dokni State Council of Science, Technology & Environment (SCSTE), Tura-ni Meghalaya Science Society baksa Tura Science Centre-o manidilangaha aro ia salko manianio, Williamnagar, Baghmara, Samanda, Resubelpara aro uandakgipa biaprango donggipa dam 10 skulrangoni gimik sak 180-mangni gita chatro chatrirang bakko ra·angaha.
Ia salko maniani bak gita chatro chatrirangna quiz, extempore speech, slogan writing, essay writing, models eco-project aro uandakgipa program-rangkoba ong·atangaha.
Ia World Environment Day-ko manianio, West Garo Hills a·jani Deputy Commissioner Jagdish Chelani, mongsonggipa sokgipa ong·e bakko ra·angaha aro uanbaksana ia program-o Tura Don Bosco College-ni Principal Fr Bivan Rodriques Mukhim aro gipin official-rangba bakko ra·angaha.
Tura-ni College of Community Science-oba ia World Environment Day-ko maniangaha aro ia salko maniani bak gita poster salsusaani, Rangoli susaani aro bol chararangkoba ge·angaha. Ia program-ko ong·atanio West aro South West Garo Hills a·jani Divisional Forest Officer Ganeshan P, mongsonggipa sokgipa ong·e bakko ra·angaha. Ia salko manianio, college-ni Dean Dr Jyoti V Vastrad-ni dilanichi bite nanggipa bolrangko ge·angaha.
Indake ong·engon, ia World Environment Day-ko Tikrikilla jolni dingtang dingtang NGO-rang, chong·motan AAPE, CEPARD, ADE, FAF, NGCO aro ACHIK dolrang nangrimenba, Tikrikilla-ni MLA Jimmy D Sangma, Raksamgre MLA Lemison D Sangma, Tikrikilla Block-ni BDO aro dingtang dingtang manderangni dakchakanichi manidilangaha ine kobor on·aha.
Ia World Environment Day-ko Tikrikilla jolni NGO-rang, jolo donggipa dingtang dingtang skulrang baksa nangrime maniangaha aro Holaidanga Range Office-ni dakchake on·atgipa bol chararangko pang 3000-na baten ge·angaha ine kobor on·aha.
Gambegre block-ni ning·o donggipa Chenggapara songoba ia World Environment Day-o maniangaha aro ia salko manianio Chenggapara skulni chatro chatrirang, skigiparang aro songni manderangba bakko ra·angtokaha.
Tura-ni Ballonggre-o donggipa 120 Bn CRPF dolni gitaba World Environment Day-ko maniangaha aro ia salko manianio CRPF dolni sipairang pang 2000 bol chararangko ge·angtokaha.
Bol chararangko 120 Bn CRPF-ni commandant Pramod Kumar Singh-ni dilanichi ge·angaha aro ia bol chararangko Tura Ballonggre aro Williamnagar-o ge·angaha. Dingtang dingtang bolrang, jekai Ashok, Jamun, Kahtal, Te·gatchu, Amrud, Gulmohar, Balsam, Tejpatta, Dalchini, Agar aro uandakgipa bol chararangko CRPF-ni sipairang ge·angaha.