SHILLONG: 1972 bilsini Job Reservation Policy-ko gital dake nipiltaichina dabianio, Khasi-Jaintia aro Garorangni gisepo maming dakeba ding·chaogrikataniko ra·bana miksonganirang dongja ine Voice of the People’s Party (VPP) talataniko on·ataha.
Job Reservation Policy-ko gital dake nipiltaichina dabienba, re·anggipa antiosan VPP-ni president Ardent Miller Basaiawmoit, antigimik okumu chake jingjengatangahachim ine nikna man·a. Ia Reservation policy-ko nipilna gita dingtangmancha sorkari, expert committee-ko songna ku·rachakani ja·mansa ua uni okumu chake jingjengataniko dontongatpilahachim.
Reservation policy-ko nipiltaichina dabianiara VPP-ni politics kal·ani aro jatgnini gisepo ding·chaogrikataniko ra·bana jotton ka·anisa ong·enga ine dingtang dingtang dolrangni matnanganirangko jegalatengon, “Ia reservation policy-ko chinga maming ding·chaogrikataniko ra·bana ba meligrikgijaniko ra·bana jako ra·e dabienga ong·ja indiba a·doko songdongenggipa pilak jatrangnan apsan bak rengsiko on·na miksonganiosa dakenga. VPP dolde Tribal manderangna on·gimin bilko chel·chakna gita Meghalaya a·doko songdongenggipa pilak manderangnan ong·a,” ine VPP-ni ku·wattimgipa Batskhem Myrboh parakataha.
Meghalaya a·dokni politics-o dingtanganiko ra·bae ramram manderangni namgnina kamko ka·na man·na gita Garo Hills-o songdongenggipa manderangkoba VPP baksa bakrimchina ua didiataha.
Sorkarini ra·gatna sienggipa roster system-ni gimin janapatengon, job reservation policy-ko gital dake nipiltaiani gri roster system-ko ra·gatgenchimode skangoni ong·baenga gitan sorkarini kamrangko on·anio apsangrik ong·na man·chipjawa ine VPP parakataha.
“A·dokni reservation policy-ko ru·uta somoirangna skangan gital dake nipiltaina nangani ong·ahachim indiba political dolrang bang·batan an·tangtangni man·gnina chanchie, ia reservation policy-ni bidingo ku·rangko on·diljaha. Ia reservation policy-ko gital dake nipiltaichina dabiengon, badiaba jatna mikkang nitee chinga dabienga ong·ja indiba kamrangko tikatanio pilaknan apsan ong·china gitasa ong·enga,” ine Myrboh parakataha.
Assam a·dokni somoio Khasi aro Garorang ku·cholsan ong·e Meghalaya a·dokna man·na krengaha aro mikkangchiba jatgnini namgninan meli nangrime dongangkuchina ineba VPP parakataha.
“Uni gimin chinga Garo Hills-ni chingni jong-ada no-abirangkoba VPP-ni Meghalaya a·doko politics-ko dingtangatna krenganio bakrimchina okamatenga. Ku·cholsan ong·e an·ching mikkangchi Meghalaya-ko teng·suatna man·gen,” ine VPP-ni ku·wattimgipa parakataha.
