SHILLONG: Da·ororo salantian Meghalaya a·doko gong kror 3-ni bijoliko brena nangenga aro da·o sal 100-na apsan dakgipa obosta ong·angkuna nanggenchimode bijoliko breanio gong kror 300-ko koros ka·dape apsan daken load shedding-ko ka·angkuna nanggen ine Mongolbar salo, a·dokni Chief Minister Conrad K Sangma parakataha.
Chief Minister-ni parakatani gitade, batanggimin jarango a·doko chu·onga gita mikkarang wajaengani a·sel Umiam-o chirang dongjae da·o chipna nangani cholrang dongpilengaha aro ia ia bilsian a·doko mikka wajabatgipa bilsiba ong·enga.
“A·doko bijoliko bikotna man·jaengani a·selan chinga salantian kror gittamni bijoliko brena nangao ga·akenga aro mikkangchiba iandake sal 100-mangna apsan obostako chagrongangkuna nanggenchim ong·ode chinga gong kror 300-ko koros ka·dape da·alo ka·enga gitan load shedding-ko ka·angkuna nanggen,” ine Sangma aganaha.
Ia sal somoirango obostarang namen neng·beani ong·enga ine janapatengon, “Iana batede load shedding ka·aniko ba bijoli kimitaniko dakna nangjana gita chinga jotton ka·enga indiba ia pilakan obostaosa pangchakaigen aro an·chingna mikkarangko nangchongmotenga. Je obosta ong·genchimoba ia pilakan sorkarini a·selde ong·ja aro chinga pilakni namgninan chanchie kamko ka·na jotton ka·enga,” ine Chief Minister parakataha.
Da·ororo bijoli chu·ongjaengani a·sel Shillong aro Tura jillarango konta chetna bijoliko kimitna nangengon, a·dokni gipin biaprangode salo konta 10 ka·e bijoliko kimitna nangskaengachim ine nikna man·a.
