AMPATI: South West Garo Hills a·jani ning·o songdongenggipa mitam manderang, Aadhar baksa link ka·gipa mobile nombor-rangko jakkalgija dingtang mobile nomborrangko jakkale, uko Aadhar nombor baksa link ka·jani a·sel bank account kuliani somoirango OTP sokjaenga ine South West Garo Hills a·jani Deputy Commissioner parakatenba, pilakkon donatgimin enrollment centre-rangona re·bae, an·tangtangni mobile nomborrangko update ka·echina gita u·iataha.
South West Garo Hills a·jani Aadhar enrolment centre-rangara, Ampati-o donggipa DC office, Betasing C&RD Block office, Zikzak C&RD Block office, Rerapara C&RD Block office, Mahendraganj PWD IB aro Garobadha PWD IB ong·a.
Aadhar-na biming segatani aro photo ka·anirangko a·bachengataha ine u·iatengon, badia songo mai tariko photo-rangko ka·enga, uarangko ma·sina ra·na gita District Administration SWGH-Ampati Facebook page-oniko nie ra·china gita SWGH a·jani Deputy Commissioner u·iataha.
Indake ong·engon, sorkarini ra·gate on·gipa dingtang dingtang scheme-rang, jekai MGNREGA, NFSA, NSAP, LGP, MHIS, PM-KISAN aro Post- Matric Scholarship-ko ra·na gitaba da·o Aadhar-ko nangtelengahani gimin pilakkon Aadhar-na biming segatchina gita Deputy Commissioner didiataha.
