SHILLONG: Justice (retd) T Vaiphei-ni dilenggipa judicial inquiry commission, jean mija bilsi November jani 22 tariko Mukroh-o ong·anggipa obostako am·sandienga, ua commission, Assam sorkarini sakkiko Guwahati-o porikka ra·anggen. Assam police official aro forest personnel-rang Mukroh obostani mamlao Shillong-ona re·bana kentokenga.
Assam-ni counsel, Guwahati-o sakkirangko porikka ba cross-examination ka·na mol·molaha. Mol·molanio Meghalaya sorkarina maming neng·nika dongjani a·sel ra·chakaha.
Justice (retd) T Vaiphei, a·bachengaode Byrnihat-o hearing ka·china agan-ku·pattiahachim indiba Assam police Guwahati-o chu·gimik kamrangko ka·na chakpagen ine aganskaha. Iana Meghalaya sorkari maming neng·nika dongjani gimin uamangni mol·molaniko ra·chakaha. Indake Commission, Guwahati-o Assam sorkarini sakkirangko examination ka·na ba porikka ra·na tik ka·aha.
“Examine aro cross examine ba sandia matchota ja·man, mamlako Shillong-ona jitattaigen,” ine Justice (retd) T Vaiphei aganaha.
Assam Police officer aro personnel-rang unbaksana Forest Department-ni official-rangko cross -examination ka·angna gita June 15 aro 16 tariko donataha. Guwahati-o June 15 aro 16 tariko pring 11 bajio sing·sandianggen.
Mni Sukrobar salo hearing ka·mitingo inquiry ba am·sandianiko dakenggipa Commission, Meghalaya-ni palo aganchakenggipa counsel S. Sahay, AS Pandey aro A. Sharan- mangni kattarangko knaaganaha. Una agreba Assam-ni palo aganchakenggipa P.N Goswami, Addl. Advocate Genereal, Assam, D. Gogoi-mangni kattarangkoba knaangaha. Indake court, Mukroh songoni counsel T.L Jyrwa-ni kattakoba knae ra·aha.
