TURA: Meghalaya a·dok gimikon drugs ba pekatgipa sam jakkalaniko aro badingsrukaniko bon·atna police-rang rakbee kamrangko ka·engon, South Garo Hills a·jao pekatgipa samrang baksana mande sakgittamko police-rang rim·na man·aha.
Koborko on·ani gitade, pekatgipa samrangko badingenggipa manderangni gimin koborko man·soani ja·man, Baghmara-ni Anti Narcotics Task Force (ANTF) official-rang, Gasuapara-o donggipa nok te·saoniko am·sandina re·angon, ia nokoniko te 256 Phensedyl samrangko man·aha aro uandaken ja·mano iani bidingo mande sakgittamkoba rim·na man·aha.
Phensedyl samara gusu sam ong·a aro ia samko bang·a manderangan pekatna gitaba jakkalrongskaachim.
