SHILLONG: 1972 bilsini Meghalaya State Reservation Policy-ko nipiltaina gita songako man·enggipa expert committee-ni membor-rang, a·dokni itihas aro a·doko songdongenggipa dingtang dingtang jatrangni bidingo tale ma·sigiparang ong·na nanga ine Meghalaya a·dokni Trinamool Congress (TMC) parakataha.
“Je committee-ba ong·china pangnan a·dokni itihas, niam retirang aro dingtang dingtang jatrangni gimin name ma·sina gita nangchongmota. A·dokni gimin ma·sijagenchimode committee-ni membor-rang ong·na man·jawa,” ine TMC-ni vice president George V Lyngdoh parakataha.
Bilsi 51 ong·gipa a·dokni reservation policy-ko nipilna gita expert committee-ko songna, dingtangmancha Chief Secretary DP Wahlang-ni dilanichi membor sakgittam donggipa search committee-ko a·dok sorkari songe donangahachim.
Kamko ka·anio pilak jatrangni gimin chanchina nanga ine janapatengon, reservation policy-ko nipiltaina gita ja·kuko de·engon, ia policy ba niamni itihaskoba nina gita nanga ine Lyngdoh parakataha.
Expert committee-ni raiko a·doko songdongenggipa manderangna mesokatna skangba political dolrang, songsalni dolrang aro a·doko songdongenggipa manderangni chanchianirangkoba ra·chengchina gita TMC-ni dilgipa didiataha.
