TURA: World Blood Donor Day-ko maniani bak gita Budbar salo, 120 Battalion CRPF dol, Tura Civil Hospital-ni medical staff baksa bakrime, an·chi on·gilani program-ko Tura Dakopgre-o donggipa CRPF camp-o ong·atangaha.
Ia an·chi on·gilani program-ko 120 Bn CRPF-ni Commandant Pramod Kumar Singh-ni dilanichi ong·atangaha aro ia program-ko ong·atanio ua 120 Bn CRPF-ni sipairangna aganprakengon, an·chi on·gilani gamchataniko talate on·angenba, uamangni gamchatbegipa an·chirangko on·gilanichi saniba janggirangko jokatna man·gen ine parakangaha.
Mikkangchiba an·tangtangni an·chirangko on·gilangkuchina aro sakgipinrangnaba iani bidingo u·iatrikrikskachina gitaba ua sipairangko didiangaha.
