BAGHMARA: South Garo Hills a·jani Darang Boldak songo PMGSY ramako tariani namja ine Niksamso Garo Community Organisation (NGCO) matnangataha.
NGCO Southern Zone-ni president Arjun S Marak-ni parakatani gitade, ia songni PMGSY ramako tariani bidingo manderangni badi ka·anirangko man·soani ja·man, NGCO-ni membor-rang, ia ramako re·ange nion, ia ramako dongimin niamrango pangchake tarijaha ine nikna man·aha.
“Manderangni badi ka·anirangko man·soani ja·man chinga ia biapona re·ange PMGSY ramako nion, ia ramako name tarijaha ine nikna man·aha. Songo noko donggipa manderangni namgninasa PMGSY scheme-ko ma·mong sorkari ra·gate on·ahani gimin ia ramarangko tarienggipa contractor-rang kakket ong·e kamko ka·na nanga,” ine Marak parakataha.
Ia Darang Boldak songni ramako name tarie on·pilchina gita contractor-rangko didiatengon, ia kamko chu·sokatjagenchimode contractor-rangni kosako nanga gita ja·kurangko de·anggen ine NGCO mikrakataniko on·angaha.
Indake ong·engon, iani bidingo uamang, South Garo Hills a·jani Deputy Commissioner-na badi ka·e sedoatgen ineba NGCO southern zone-ni president parakataha.
