BAGHMARA: Ia sal somoirango mikkarang jime waengani a·sel Garo Hills-ni pilak biaprangon chiringrang dal·bae badiaba badiaba biaprango a·sel ong·anirangko nikna man·engon, South Garo Hills a·jaoba Ramgittim Mahadeo songni bilsi 34 ong·gipa mande saksa, Mahadeo chibimako batangengmiting somoio sripe sina nangaha.
Koborko man·soani gitade, chio sripe sigipa Walchang Sangma, re·anggipa June-ni 28 tarik Budbar salni 11:00 bajimango, an·tangni wa·achi tarigipa ringo, Mahadeo chibimako batangengachim indiba uni ringko choangengmiting somoio maibakae uni sandal go·okahani gimin ua an·tangni sandal-ko rim·rikna jotton ka·on, uni wa·achi tarigipa ringko ta·rake jokenggipa chi man·pakangaha aro uaba chio salopangako man·aha.
Uni manggisiko apsan salni attam 3:15 bajimango, chi ka·majolonikosa man·eaha aro ja·mano uni manggisiko uni nokdangna pakwate on·ataha.
Bristibar pringoba East Garo Hills a·jao, Nengkra Watregittim joloni bilsi 15 ong·gipa chadambe saksa, an·tangni ripengskarang baksa Rongtam chibimaoniko na·tok rim·engmitingo sripe sina nangahachim.
Da·ororo mikkarang wajringenganichi Garo Hills-ni bang·bata biaprangon chirang ta·rakengani gimin skatang chi sambarango rojachina gita District Administration mikrakatanirangko on·engachim.
