JOWAI: Sukrobar pringwalni 3:00 bajimango police-rang, Jowai-o drugs ba pekatgipa samrangko badingenggipa mande saksako rim·na man·aha.
Police-rangni u·iatani gitade, ia mandeara Jowai-o drugs-rangko badinganio mongsonggipa mande ong·achim aro iana skang saksa Jimmy Sutnga minggipa mandeko rim·ani ja·man ia Sdangki Myrphet minggipa mandekoba police-rang rim·na man·aha.
Ia mandeoniko police-rang, gram 4.61 ong·gipa heroin sam baksana gong 1,90,500 aro nombor plate donggijagipa Alto 800 gari bolsakoba man·aha.
Iarangna agreba police-rang, rim·a man·gipa mandeoniko drugs chipe palani ma·manti bosturangkoba man·aha ine u·iataha.
