TURA: SSA skulrango skigiparangna re·anggipa April jaoni June jaona jagittamni dormaharangko on·kujaengani a·sel skigiparang neng·nikanirangko chagrongna nangtokengaha ine All Garo Hills SSA School Teachers Association (AGHSSASTA) parakatenba, skigiparangni man·na nangkuenggipa dormaharangko ta·raken on·china gita a·dokni Chief Minister Conrad K Sangma aro Education Minister Rakkam A Sangma-ko didiataha.
AGHSSASTA-ni parakatani gitade, SSA skulrango skigiparangni dormaharangko somoi gita on·gnok ine re·anggipa bilsion a·dokni Deputy Chief Minister Prestone Tynsong ku·rachakaniko on·manahachim indiba da·onan skigiparang somoi gita dormaharangko man·jaengani a·sel neng·nikanirangko chagrongna nangtokkuengachim.
“Chingna April jaoni June jaona jagittamni dormaharangko on·kujaengani a·selan nokni nanganirangko aro mongsongbate dedrangni skul fee-rangko gamna man·tokkujaengani gimin mitam bi·sarangkode jadokni porikkarangko sena on·jawa ine ka·mikkenatanirangko man·tokpilengaha. Uni gimin chingni neng·nikanirangko ma·sichake, ia jagittamni dormahako ta·raken watatpachina chinga Chief Minister aro Education Minister-ko mol·molatenga,” ine AGHSSASTA-ni dilgiparang parakataha.
