TURA: Ramarangko tarina gita chame on·gipa tangka paisarangko oke ra·ani ja·manba ia ramarangko tarigija donchipaha ine dolgni self help group (SHG)-rang, chong·motan Tura Walbakgre-oni Akusa SHG aro Ampati Kebolpara-oni Chinasa SHG-ni kosako East Garo Hills a·jani Niksamso Garo Community Organisation (NGCO), South West Garo Hills a·jani Deputy Commissioner-na badi ka·doangaha.
NGCO-ni parakatani gitade, Durapara songo gari re·na man·gipa ramako tarina gong 9,98,000-ko aro Bakdagre songoba gari re·na man·gipa ramako tarina gong 9,99,000 tangkarangko chamahachim. Ia ramarangko tarina gita chamgipa gong 19,97,000 tangkarangko Tura Walbakgre-oni Akusa SHG-ni secretary, Zikzak C&RD Block-ni CMSDF-oniko okaba okahachim aro report-oba ramako taria matchotaha ine mesokahachim indiba ua biapona re·ange niode rama tariako nikna man·skajaha ine NGCO matnangataha.
Apsan daken, Debajani songo gari re·na man·gipa ramako tarina gong 9,99,300-ko, Sanjengpara-oba gari re·na man·gipa ramako tarina gong 9,99,300-ko aro Aruakgre songoba gari re·na man·gipa ramako tarina gong 9,99,600 tangkarangko chamatahachim ine NGCO parakatenba, ia ramarangko tarina chamgipa tangkarangoni gong 29,98,200 tangkarangko Ampati Kebolpara-oni Chinasa SHG-ni secretary, Zikzak C&RD Block-ni CMSDF-oniko okahachim indiba ramarangko tarigija donchipaiaha ine matnangataha.
Ia dolgni SHG-rang, songni namgnina chamgipa gong 49,96,100 tangkarangko oke ra·aha ine matnangatengon, iani bidingo inquiry-ko dakenba, ia dolgni SHG-rangni kosako nanga gita ja·kurangko de·china NGCO, South West Garo Hills a·jani Deputy Commissioner-ko didiataha.
