U·IATTIMGIPAONI
SHILLONG: Meghalayao, Govt Lower Primary (LP)School-rango ge 1200 batpile bangbang ong·e dongenggiparango Meghalaya Teachers Eligibility Test (MTET) pass ka·gimin candidate-rangko rakkina gita A·dok Sorkari chanchie donmanaha.
Iarangni bidingo Sombaro parakatengon, iana advertisement-ko July 14 tariko on·anggen ine Education Minister Rakkam Sangma aganaha.
MTET candidate-rang batanggimin 2021-o porikkarangko ong·ataha aro unonin darangkoba kamo rakkia dongkujaengachim.
Pass ka·gimin candidate-rangko kamo rakkichina gita MTET pass ka·gimin candidate-rang re·anggipa somoio a·dok sorkariko didiahachim ineba nikna man·a, maina uamang bilsi gnina kingking kamgri ong·e dongtokenga.
Sorkari, temporary teacher-rangko rakkina gitaba ku·jokahachim, indiba MTET pass ka·gimin candidate-rang uakode ra·chakskajaha, indake permanent rakkichina aro kamrangko ta·rakatchina gitaha uamang dabiaha.
Education Minister Rakkam Sangma indakeba parakaha je, somoi nangbeaha inoba jagnini gisepon, August 15-na skangde bangbang dongenggipa post-rango gapatna sorkari miksonge donenga.
“Kamrangko ka·anio somoi nanggnigipa ong·a ong·e ine chinga ma·sioba, jagnini gisepon, pilak kamrangko matchotatna chinga jotton ka·enga,” Pa Sangma aganaha.
