U·IATTIMGIPAONI
JOWAI: West Jaintia Hills-ni a·songgipin sima-ari gita Bangladesh-ona badingat-na miksonggipa bol 7 ringrango gatgipa chini-rangko bang·en Meghalaya 04 Bn BSF-ni nirikkigipa sipairang rim·aha.
Kobor on·atako man·e BSF sipairang BOP Jaliakhola sepang Harai chibimao choangenggipa adita bol ringrangko chanchichipe uamangko neng·takate rim·aha.
BSF-ko warachake, Bangladesh-ni namgija dakgiparang chibimaona bilsruaha aro Bangladesh-ona jroe kataha aro uamangni ringrangko chibimaon galangaha. BSF sandie nion gong lak 11-mang tangkana batgipa km 29000-mang ong·gipa a·songtangni ringo engine pate salgipa ring bol 7-o badingsrukgipa chinirang-ko ra·sekaha. Ra·sekgipa chinirangko talbate sing·-sandina gita Dawki-ni custom office-na pakwatataha.
