New Delhi: Meghalaya, jean da·o bilsi 10-ni gisepo India a·songni a·dokrangni gisepo ten-billion-dollar economy-ona sokdona gita miksongengachim, 2015 aro 2012-ni gisepo kangal-cha·asigiparang adita komiangahao mangba India a·songo kangalbatsranggipa a·dokrangni gisepo Bihar-ni ja·man gnigipa ong·kuenga ine NITI Ayog-ni report-o parakataha.
Bihar a·doko kangal-cha·asigiparang da·omiting 37.21% ong·engon, uamangni ja·mande Meghalaya-an gnigipa ong·enga, jeon A·doko 31.3% kangal-cha·sigipa manderang donga. Ia a·dok damgni ja·mano, Uttar Pradesh (30.03%), Jharkhand (29.75%) aro Arunachal Pradesh (22.21%) ong·enga ine National Family Health Survey-5 (NFHS-5)-o pangchake NITI Ayog parakataha.
Niti Aayog-ni, Multidimensional Poverty Index (MPI)-ni gnigipa edition-o indakeba chamatenga je, Indiani manderangni gisepo 14.96% mangni gitade, cha·a ringanio, lekka porao, nok-jamo, ugita gipin nangchongo kangal-cha·asigiparang ong·a. Gimikni gita niatgenchimode, 207.9 million (20.79 kror) Indiani manderang kangal cha·asian baksa pilakni gitan neng·nikaniko man·enggipa ong·a.
Chief Minister Conrad Sangma, re·anggipa budget session-o, manderangna miksonge pilakni gita silroroaniko ra·bana gita tarigimin budget-ko parakatahachim. Aroba re·baenggipa 2027-28 bilsiode ge·sa 10 billion$ Economy a·dok ong·na nisan ka·an baksa 3023 mangode a·songo top 10 a·dokrangni gisepo ge·sa ong·pana gitaba nisan ka·enga.
Unomitingo Meghalaya a·dok, lekka bidako on·anio, sana-banani a·bao, ringani chirangko on·anio, gimikni gitan ja·manchakgipa ong·enga.
NITI Ayog-ni report-o gitade, Meghalayani manderangni gisepo 9.01% manderangde bank account-an dongja, jean Meghalaya-ko ja·manchakbatgipa a·dok ong·atenga. India gimikniko niatgenchimode, 96% manderango bank account-rang dongtoka, 4% manderangsan bank account gri dongaia. (eom)
