NEHU, NEP 2020-ni bidingo chanchirimna Principal-rang baksa tom·a  

SHILLONG: National Education Policy (NEP) 2020-ko ra·gatani bidingo chanchirimna North Eastern Hill University (NEHU), Sukrobar salo Vice-Chancelor, NEP 2020 Implementation Cell, aro NEHU baksa bakrimgipa gimik college-rangni principal-rang baksa tom·e chanchirimangaha. Iana skang mni July 19 tairko NEHU-ni Vice-Chancellor, NEP 2020-ni bidingo kobor ra·timgiparangna parakatengon, mikkang ja August jaoni ra·gatna chanchianiko parakataha.
Meeting ba tom·anio Vice-Chancellor Prof. Prabha Shankar Shukla, dilangaha, jeon NEHU baksa bakrimgipa gimik ge 73 college-rangni principal-rang bak ra·angotkaha.   NEHU-oni University-ko represent ka·gipa NEP 2020 Implementation Cell -ni memborrang- Prof. Sherwin May Sungoh, Prof. G. Bez aro Dr. Dinesh Bhatia- uamangko man·gope bak ra·angtokaha. Controller of Examination, Col. Omkar Singh (Retired), Shri Debashish Choudhury, OSD, College Development cell- uamangba meeting-o college principal-rangni NEP-ni bidingo sing·arang dongode uko talate on·na bak ra·angaha.  
Tom·anio NEP 2020-ko ra·gatani bidingo name dake chanchirimangaha, jekai, curriculum, syllabus, stand alone colleges, Academic Bank of Credit (ABC), multi-disciplinary course, skill enhancement courses aro faculty-ko development ka·na nangnikani bidingrango agangrikangaha. College-ni principal-rang NEP 2020-ko ra·gatani bidingo aditan sing·anirangko sing·angaha. Uandake NEP 2020-ko ra·gatanio chu·sokatna college-rangna NEHU dakchakgen ine Vice -Chancellor, ka·dongataha.
Je college-rangon mitam course dongja, indiba NEP 2020 framework-ko ja·rikna janapani bidingrango sing·angaha. OSD, College Development Cell, ia sing·anirangna talatengon, ua college-rang course-na affiliation -ko apply ka·na nanggen, University, inspection aro affiliation-ni kamko ta·raken ka·gen ine talate on·aha. NEP 2020 implementation cell, principal-rangna NEP 2020-ko parakatanio gital ordinance-rangni gimin, major & minor course aro bilsi 4 undergraduate course-ko parakatanio maidakgipa namgnirang donga, iarangni gimin u·iataha.
Uandake meeting matchotao gimik college-rangan New Education Policy-ko ra·gatanio namnikpaaniko agantokaha. Principal-rang NEP-ni gimin talbate u·iani ja·man ra·chakna namniktokaha. Indake Vice-Chancellor, principal-rangko tom·anio bak ra·pae namnikpaaniko on·anina mittelataha.