TURA: Re·anggipa Sombar attamo, Tura-ko Winter Capital songchina aro Reservation Policy-ni Roster system-ko backlog policy-o ra·gatchina dabienggipani bidingo a·dokni Chief Minister Conrad K Sangma, dingtang dingtang dolrangko Tura-ni Chief Minister’s Office (CMO)-o gronge agangrikengmiting somoio ro·ongrangchi goe aro garirangko so·chipe chadrapahani gimin West Garo Hills a·jani National People’s Party (NPP) aro National People’s Youth Front (NPYF) suk ong·gijaniko parakatenba, iandakgipa kamara gundarangni kamko mesokanisa ong·aha ine matnangataha.
“A·dokna dangdike on·gipa manderang ong·e chinga NPP dolni member-rang, iandakgipa kamko raken jegalenga aro mikkangchi iandake so·sojengjeng ong·atani kamrangko ka·gija tom·tomao dabina nanganirangko dabichina chinga mol·molenga. Tom·tomaniko rakkiangchina aro ia kamko chu·sokatna sorkarini krenge kam ka·anio sorkari baksa bakrimaniko on·china chinga manderangkoba mol·molenga,” ine West Garo Hills a·jani NPP parakataha.
Indake ong·engon, Tura-ni CMO-ko kragija dake chadrapaniara, ong·gija dakgipa dolrangni kam baksa apsanangaha ine NPYF-ba suk ong·gijaniko parakataha.
“Iandake chanchininggija kamko ka·anichi Chief Minister-na kenchakna nanganirang ong·ahachim aro iandakgipa kamko chinga raken jegalenga. Ia biapo so·sojengjeng ong·atgipa manderang chanchisamsoa gnangsa re·baaha aro uamangni kamara gundarangni kamko mesokani ong·aha,” ine NPYF parakataha.
Manderangni janggiko jokatna aro nangchongmotgipa manderangna dakchakanirangko on·gipa ambulance gariko so·chipe galahani giminba NPYF suk ong·gijaniko parakataha.
So·sojengjeng ong·atgipa manderangni kosako rakbatsranggipa sastirangko on·china dabiangengon, tom·tomaniko rakkiangchina aro ong·gija dakanio jak donggipa manderangko rim·na kam ka·anio sipai dolrang baksa bakrimaniko on·china gita NPYF, manderangko didiataha.
