SHILLONG: Tura-o so·sojengjeng ong·anina Bharatiya Janata Party (BJP) Mahila Morcha-ni membor sakgnikoba rim·ahani gimin BJP Meghalaya Unit talataniko on·angenba, iandakgipa jingjengatanirango bak ra·na gita Mahila Morcha-ni membor-rangna ge·etaniko on·a dongjachim ine parakataha.
Tura-o a·sel ong·aniko jegalatengon, iandake jegalanirangko dakanio BJP maming saloba chakpaanirangko on·ja aro iandakgipa jingjengatanirango bak ra·china gita Mahila Morcha-na ge·etaniko on·aba dongja ine BJP-ni state president Ernest Mawrie parakataha.
Sombar attamo, Tura-ni Mini Secretariat-o ACHIK aro dingtang dingtang dolni dilgiparang baksa Chief Minister-ni tom·e agangrikengmiting somoio rang·gitik ro·ongrangko goe so·sojengjeng ong·atanio jak donganina police-rang, BJP aro TMC-ni sak 18 membor-rangko rim·ahachim aro rim·a man·gipa sak 18 manderangoni sakgnide BJP Mahila Morcha-ni membor-rang ong·achim. Ia membor sakgniara Tura Dobasipara-oni bilsi 32 ong·gipa Bellina M Marak aro Tura Akonggre-oni bilsi 40 ong·gipa Dilche Ch Marak ong·achim.
Ia so·sojengjeng ong·anio jak donggipa pilak manderangkon rim·china gita sorkariko didiangengon, “BJP-ba sorkarini bakan ong·e manderangni namgnina jekon sorkari tik ka·genchim, ukon BJP-ba namnikpaaigen. Badiaba dol maikoba dabienga ong·ode, uni a·sel songjinmako chalaianio nangchakeani dongna gita nangja,” ine Mawrie parakataha.
Ia a·selni bidingo BJP, West Garo Hills office-oniko report-ko bi·atgen aro ia a·sel ong·anio jak dongbebea ine nikgenchimode membor-rangni kosako nanga gita ja·kurangko de·gen ineba BJP-ni state president ku·rachakaniko on·ataha.
Ia a·sel ong·anio jak donggipa membor-rangni kosako sal 15-ni gisepon ja·kurangko de·na gita disciplinary committee-na daitoko on·gen ineba Mawrie parakataha.
