SHILLONG: Adita salrangna skang, Tura-ni Chief Minister’s Office (CMO)-ko badiaba manderangni chadrapaniara a·dokni skotongko aro joltangni MLA-ko chadrapanisa ong·aha ine ia a·selni bidingo name sandirokaniko dakchina gita a·dokni Education Minister Rakkam A Sangma-ba didiataha.
“Ian namen kenbegnigipa a·sel ong·aha aro pilakan iana jagokmanpilaha,” ine Sangma aganaha.
Sombar walo manderangni chrik a·bokanirangara politics-ni gita ding·chaoataniko mesokaniba ong·aha ine janapatengon, ua somoio so·sojengjeng ong·atgipa manderangoni mitamrang, ‘Trinamool Congress dolmangmangsan Garorangni party ong·a aro NPP-de Garo ba Khasi party ong·na kraja’ inerang chrik a·boktokaha ine Sangma parakataha.
Sangma-ni parakatani gitade, NPP-ko ‘Nepali People’s Party’ inerangba mitam manderang ua somoio chrik a·boktokahachim.
“Ua somoio katta jakkala bewalrangan badiaba political dolrangsa ia so·sojengjeng ong·ataniko chanchisamsoe dakdilaha ine mesokani ong·a,” ine Sangma aganaha.
Rim·ako man·gipa mitam manderangara political dolni dilgiparang ong·achim aro saksade dolsani candidate ong·achim ineba ua aganaha.
“Uamang pilakan ia so·sojengjeng ong·atanio jak donga aro uamang manderangni gisepo dongpaaha. Unwalo Chief Minister office-oni ong·katbagenchimode una maian ong·genchim,” ine Cabinet Minister aganaha.
Indake ong·engon, Tura-ko Winter Capital songchina dabienggipani bidingo agangrikengmitingo Chief Minister aro dingtang dingtang dolni dilgiparangko chadrapanio jak donggipa manderangko aro ia so·sojengjeng ong·ataniko dakdilgipa manderangko Garo National Council (GNC)-ba raken jegalataha.
“Ua somoi manderangni katta agananirangko video-rango niksona man·e chinga namen ka·a be·a. A·dok gimikna kratchaaniko ra·bagipa manderangko dongimin niamrango pangchake rim·na nangchongmota,” ine GNC-ni general secretary Augustine R Marak parakataha.
Chief Minister-ni gadangko aro sal 15-na okumu chakenggipa dingtang dingtang dolni dilgiparangko mande ra·na nangachim ineba Marak parakataha.
