TURA: North Garo Hills a·jani Kharkutta jolo rikgipa Residential skul building-ko matchotgija galchipe donengani a·sel da·o ia biaprango buring dikkrippilenga ine A·chik Holistic Awakening Movement (AHAM) Kharkutta regional unit parakatenba, ia jolo songdongenggipa manderangni namgnina aro mongsongbate chatro chatrirangni namgnina ia skulko ta·raken matchotate on·china a·dokni Chief Minister Conrad Sangma, Education Minister Rakkam A Sangma aro Kharkutta-ni MLA Rupert Momin-ko didiataha.
AHAM Kharkutta unit-ni president Stephen Marak-ni parakatani gitade, ia skulara Kharkutta jolo donggipa Imsambal songo rikgipa skul ong·achim indiba uamang August-ni 1 tarik Mongolbar salo ia skulona re·angon, ia skul nokni wilwilao burung dikkripe dongengakosa aro skul nokni nokkingrang gita mikka chirangni selprue donganikosa nikna man·ahachim.
“Ia skul nokko bilsi 10-mangna skangan rikmanahachim indiba ia skul nokko rikani namjani a·selan skul nok nokking gita mikka chirang selpruengaha. Ua jolo songdongenggipa manderangni chingna parakatani gitade, ia skulko sorkari matchote rike on·gen ine ka·dongenba uamang bilsio changprakde maming tangka paisarangko ra·gija, buringrangkoba o·rokengachim indiba da·alonan uamang sorkarioni maming kamrangko nikna man·kujaenga. Chinga sorkariko matnangna miksonge ia skulko nina re·angaha ong·ja indiba songni nokni manderangna namgipa skul nokrangko nangnikengani giminsa nina re·angaha,” ine AHAM Kharkutta unit-ni president parakataha.
Ia songo namgipa skulrang dongkujani a·selan songni nokni bi·sarang, kilometer 15-mang chel·ao donggipa Kharkutta-onasa re·rurae poraina nangtokenga ineba Marak parakataha.
“Ia skul nokko iandake bilsi 10-na maming skigiparang gri aro chatro chatrirang gri galchipe donahani gimin chinga namen suk ong·ja,” ine Marak parakatenba, ia skul nokko ta·raken matchotatenba songni nokni bi·sarangna kulie on·china a·dokni dilgiparangko didiataha.
NGH-o rikgipa residential skulko bilsi 10 batpile galchipe donenga: AHAM
Date:
Share post:
