Shillong: Meghalaya a·dok namen man·e cha·begipa aro ge·e-game cha·na namgipa biap ong·chongmota aro a·doko bang·bea dingtang dingtang agricultural, horticultural-ni product ba bosturangko man·a. Jolni manderang skang somoirangonin ja·rikbaenggipa ge·a-gamani cholrangko jakkale man·gipa ge·a-gamani bosturangara organic ba maming samgrichi dal·atgipa ong·a. Ian Meghalaya a·doko man·gipa me·su-samjak, bolam biterang ba uandakgiparang dingtangmancha cha·toa. A·doko man·gipa Lakadong turmeric ba rokomsa holdi, GI-tag man·gipa Khasi mandarin (rokomsa komila) Kew pinaaples ba anaros biterang namen mingsinga.
Adita somoirangoni Meghalaya a·doko man·gipa anarosko namen mingsingenga. Meghalaya-ni anaros, India-ni gipin bakrango man·gipana bate nambata cha·tobata. Brix value 16-18 donga, jeni a·sel chi·bata.
Minggipin a·doko man·gipa anarosko Azadi Ka Amrit Mahotsav-ko maniani bak gita Abu Dhabi-ni Al-Wahda mall-o jinmana mesokatna donaha. Ia anarosrangko Lulu Group-ni gita mingsinggipa Gulf market ba bajar antiona palatenga. Ian a·dona namen mikkim rasongni ong·a.
Garo Hills-oni UAE-ona sokanganio adita neng·nika ba ra·biarangko chagronge sokangaha. Jamge Integrated Village Cooperative Society (IVCS) Songsak C&RD Block, East Garo Hills district, Agriculture & Farmers’ Welfare Department aro Meghalaya Basin Management Agency (MBMA) baksa bakrime kam ka·anichi gipin a·songona watatanio chu·sokaha.
Jamge IVCS baksa dambri dingtang dingtang songrangoni ge 250 baten nokdangrang kam ka·a. Anaros ge·ani kario tonne 100-ko man·ronga. Anaros ge·giparang skangde anaros rongprako INR 10-kosan man·achim indiba gipin a·songona watatengahani gimin da·ode kg prakon INR 16-ko man·engjok. Ian anaros rongprako gong 21 INR-ko man·aming apsana. Indake anaros ge·giparangni man·gni bariaha.
Meghalaya sorkari, horticulture-ni ge·gipa anarosko ru·uta somoina donkamna man·ja, ta·raken nosto ong·aniko u·ie, anaros-ni business ba bading-chiwalaniko namdapatna ja·ku de·aha. Karnataka-ni IQF Private Limited aro Ri Bhoi district-ni Umdihar IVCS baksa anaros-ko ka·sinate rakkina mobile processing unit-ko songaha. Ia unit-ko songna Agriculture and Farmers’ department dakchakaha. Unit-ko a·bachengatani antigittamon 53 MT anarosko process ka·aha.
Iarangna agreba sorkari, dingtang dingtang private limited baksa bakrimaha. Apsan daken West Garo Hills-oni Ringgi Dembema Organic Farmer Producer Company-ba 12 MT anarosko Varanasi-ona ‘DeHaat Seeds to Market’-ni gita watatna kam ka·enga.
Anaros gitan gipin bosturang jekai lakadong holdi, e·ching, Khasi mandarin, bija bitchi, golmoris ba uandakgiparangoba sorkari, kam ka·enga.
