U·IATTIMGIPAONI
SHILLONG: Meghalaya a·dokni sorkarichi chalauenggipa hospital-rango kam ka·giparang chu·ongjaengani gimin Health department, doctor aro nurse-rangko bilsisana contract gadango rakkichengna tik ka·aha.
Sombar salo, East Khasi Hills a·jani MLA-rang baksa State Convention Centre-o tom·e chanchirimani ja·man kobor ra·timgiparangna u·iatengon, doctor-rangko contract gadango kamo rakkina gita Health department, kamrangko ka·enga ine a·dokni Health Minister Ampareen Lyngdoh parakataha.
Lyngdoh-ni parakatani gitade, sak 288 staff nurse-rangko bilsisana contractual gadango rakkina gita advertisement-ko on·manaha.
“Staff nurse-rangko ta·raken contractual gadango kamo rakkina gita chinga kamrangko ka·engaha,” ine Health Minister aganaha.
Kamo ra·na sienggipa sak 288 staff nurse-rangoni sak 174-ko East Khasi Hills a·jana, sak 7-ko West Khasi Hills, sak 10-ko Eastern West Khasi Hills, sak 19-ko South West Khasi Hills, sak 6-ko Ri Bhoi, sak 14-ko West Jaintia Hills, sak 10-ko East Jaintia Hills, sak 24-ko West Garo Hills, sak 5-ko East Garo Hills, sak 10-ko South Garo Hills aro sak 9-ko South West Garo Hills a·jana ong·gen.
3 (f)-ni ning·o songako man·gipa doctor-rangko Health department, regularize ka·na cholrangko nienga ineba Lyngdoh parakataha.
A·dokni manderangna nambata sanna bananirangko on·na man·na gita MLA-rang, bakrime kamko ka·gen ineba Health Minister parakataha.
