U·IATTIMGIPAONI
SHILLONG: Meghalaya a·dokni quota gita MBBS seat-na open category-o gipin jatrangba biaprangko man·enga ine Khasi Students Union (KSU) sing·doatgipa kattarangna a·dokni Health Minister Ampareen Lyngdoh, aganchakaniko on·ataha.
KSU-ni sing·anirangna aganchakaniko on·angengon, a·dokni Tribal candidate-rangna dongimin biaprangko gipin a·dokrangoni ra·sekna jotton ka·enggipa candidate-rang donggenchimode sorkari iandakgipa candidate-rangko biming den·galpilgen ine Lyngdoh parakataha.
Screening-na okamatako man·gipa sak 14 candidate-rangoni sakgittamsan a·doktangni Tribal candidate-rang ong·a aro gipinrangde gipin jatrangonisa ong·na nanga ine KSU a·kangatahachim.
Iani bidingo talataniko on·angskaengon, iani bidingo ua Chief Minister baksa agangrikmanaha indiba iandake matnanganirangara kakket ong·genchimode, dorgasto galgipa candidate-rangko sorkari nipiltaigen ine Health Minister parakataha.
“Medical seat-rangna state quota-ni gita dorgasto galgipa pilak candidate-rangni lekkarangkon nipiltaichina officer-rangko ge·etmanaha aro chinga niam pe·aniko nie dongjawa. A·dokni candidate-rangna dongimin biaprango gipin biapni candidate-rangsa man·enga ong·ode chinga uamang pilakkon den·galpilgen,” ine Lyngdoh aganaha.
Lyngdoh-ni parakatani gitade, ia apsan candidate-rangan Manipur a·dokonaba re·ange ia seat-rangna dorgastorangko galaha aro uamangni bimingrangko den·galpilaha ine unaba iani bidingo u·iatmanaha.
A·dokni Tribal candidate-rangna dongimin biaprango gipin biaprangoni candidate-rangsa biapko man·genchimode sorkari iako ong·na on·jawa ineba Health Minister parakataha.
Ia sak 11 candidate-rangni Aadhar aro EPIC card-rangko aro ia candidate-rang bano higher secondary gadangrangko pass ka·achim, pilakkon jinmana parakna nanga ineba KSU dabiangahachim.
