U·IATTIMGIPAONI
SHILLONG: Meghalaya State Reservation Policy-ko gital dake nipiltaina Expert Committee-ko songe on·angani ja·man ia committee-o a·doktangni membor-rangko donjahani gimin mitam dolrang suk ong·gijaniko paraktokengoba, Expert Committee-o songe on·gipa membor-rangko Voice of People’s Party (VPP) kusi ong·en ra·chakangskaaha.
VPP-ni a·selsa Reservation Policy-ko nipiltaina gita sorkari, draataniko man·e dingtangmancha iana Expert Committee-ko songahachim ine nikna man·a.
Expert committee-ko songe on·ahani gimin kusi ong·aniko parakatengon, committee-ni membor-rang je jatoniba ong·china kamkosa name ka·na nangaia ine VPP-ni ku·wattimgipa Batskhem Myrboh, Sombar salo parakataha.
“Reservation policy-ko gital dake nipiltaina sorkarini songe on·gipa expert committee-ko nigenchimode iano Meghalaya a·dokni mongsonggipa Tribal jatgittamoni saksakoba donjaha ine an·ching nikna man·gen indiba committee-ni membor-rang je jatoniba ong·ja maina, uamang kamtangtangko name chu·sokatgenchimode chingna maming neng·nikani dongjawa,” ine Myrboh parakataha.
Reservation policy-ko nipiltaianiara jatsa jatgipinni kosako meligrikgijaniko ra·baani cholrang donga ine janapatengon, ia committee-ni membor-rang gipin jatrangonisa ong·e kamtangtangko name ka·na man·genchimode ian pilaknan namgni ong·gen ine VPP-ni dilgipa parakataha.
