U·IATTIMGIPAONI
SHILLONG: A·doko chadamberangni kamgri ong·e donganiko chel·chakna gita employment policy-ko ra·gate on·an baksana private company-rango 80 percent kamrangko a·doktangni chadamberangna on·china dabie Bristibar salo, Hynniewtrep National Youth Movement (HNYM), jinma tom·e re·jomaniko ong·atangaha.
Jinma re·jomaniko Mot U Kiang Nangbah point-oni a·bachenge, Lum Survey-Umsohsun aro Motphran gita jinma re·jomange Jaiaw-o matchotataha aro iana skangba, Mot U Kiang Nangbah point-o jinma asonge jingjengataniko dakangaha.
HNYM-ni jinma re·jomaniko ong·atanio Secretariat-ona re·jomanganikode police-rang champengsoaha aro uandaken Lum Survey-Umsohsun aro Motphran gita jinma re·jomange Jaiaw-o matchotatskaaha.
Jinma re·jomanio bak ra·gipa manderang, dingtang dingtang seanirang, jekai ‘Chingna kamrangkosa nanga, Festival-rangko nangja’ aro uandakgipa seanirangko ra·bite re·jomanio bak ra·angtokaha.
Ia jinma re·jomaniko ong·atani bidingo kobor ra·timgiparangna talate on·angengon, a·doko employment policy-ko ra·gatchina gita uamang 2022 bilsini July jaonin dabiengahachim aro Meghalaya a·doko private sector unit (PSU)-rang bang·en donggenchimoba a·dokni chadamberang, ia company-rango kamrangko ka·e cha·na cholrangko man·tokjaengani giminsa sorkariko gisik ra·attaina gita ia salni bako jinma tom·e re·jomaniko aro asonge jingjengataniko dakangaha ine HNYM-ni president Louis Dohtdong parakataha.
“An·ching Meghalaya a·doko niwilwale nigenchimode bang·en private company-rangko nikna man·enga indiba ia company-rango gipin biapni manderangsa kamrangko ka·batenga indide an·chingni a·doko private company-rangko donani mai namgni? Komibeoba 80 percent biapkode an·ching a·doktangni manderangan man·na nanga,” ine Dohtdong aganaha.
A·dok sorkarini ong·atenggipa entrepreneurship program-rangoniko maming namgnirangko man·jaengama ine sing·anina aganchakaniko on·angskaengon, tangka paisa donggipa manderangsa bading chiwaleba cha·pana man·a indiba tangka paisa dongpagijagipa mandede maikai bading chiwale cha·gen ine HNYM-ni president parakataha.
Haryana, Mumbai, Punjab aro uandakgipa gipin a·dokrangode kamrangko ka·e cha·anio neng·nikanirang dongjana gita private company-rangon 70 ba 80 percent kamrangkode joltangni manderangna donani gimin a·doktangni manderang namgnirangko man·enga ineba Dohtdong aganaha.
Meghalaya a·doko kamrangko ka·e cha·na cholrangko man·jaengani giminsa bobil dake chakatgipa manderangba ong·katenga ineba ua suk ong·gijaniko parakataha.
Indake ong·engon, ua re·baenggipa September-ni 4 tariko a·dokni Chief Minister Conrad Sangma-ko grongna cholko man·enga aro uko grongani somoio uamang an·tangtangni nangnikanirangko una janapanggen ineba HNYM-ni president parakataha.
