U·IATTIMGIPAONI
Ampati: South West Garo Hills-o gisikni gita name dongani bidingo awareness-ko on·a District Mental Health Programme kragipa ja·kuko de·e mijal Bristibar salo motor-bike rally-ko ong·ataha. Iako ong·nasienggipa World Mental Health baksa manijolenga aro an·chingni manderango gisikni gita name donganian mong-songgipa ong·ani bidingo awareness-ko on·a miksongani ong·a.
Motor-bike rally-ko official-ni gita South West Garo Hills-ni District Mental Health Programme-ni Nodal Officer Dr. Matgrik. K. Sangma a·bachenga-taha. Ua programme-o bang·a dingtang dingtang motor-bike salgiparang, jemangan Tura a·kawe Motorcycle Club-ni bak ong·a, district-ni an·tangtangko on·kanggipa medical aro health staff-rang baksa bakko ra·angaha. Bike salgiparang uamangni cholarango “Mental Health Matters” ine sea donggipa cholrangko ganaha, gisikni gita name dongna dak-chakna mangrakgipa katta-rangko watataha.
Rally-ko Ampati-ni Multi Facility Centre-oni a·ba-chenge Salmanpara aro Purakhasia-ni a·jolrango, Mahendraganj-ona ong·atangaha. Bike salgi-parang gisikni gita neng·-nikanirangko man·ani bidingo manderangna awareness-ko gipatna miksonge aro iani bidingo parak ong·e agangrikna didianiko on·a ia ja·kuko de·ahaBike rally-o minggipin District Mental Health Program, South West Garo Hills, ja·pang katta baksa cricket match-ko ong·atgen, “Suicide Prevention Week”-ni gita gisikni gita sin·jetako man·aoniko sakantiko jakgitele rakkina game-rangko kal·e somaiko re·atgen. Ia Cricket match-o police dol, South West Garo Hills-ni medical staff baksa kal·gen. Match-ko Betasing C&RD Block ning·o Betasing playground-o Sonibar salo kal·gen. Dr. M.K. Sangma tom·ao aganao namedake agan-ku·pattie dakchakna cholko sandie uamangko didina, dakchakaniko nangnikgipa manderangna dakchakchina aganaha. Saoba agan-ku·pattie on·a sikode 24×7 helpline nombor 9362749485-ko on·enga. South West Garo Hills-o ma·sichake aro chakchike gisikni gita neng·nikaniko man·giparangko dakchakna District Mental Health Programme aro A·kawe Motorcycle Club-ni krenge kam ka·anichi programme-ko chu·sokatna man·aha.
