U·IATTIMGIPAONI
SHILLONG: United Democratic Party (UDP), KHADC aro JHADC poll-rango susagipa party-rangko darangkoba dal·e ra·gija dakja, indiba party-ni kim·kimaniko nichina aro council aro state assembly election-rango badia dol chu·sokgipa ong·a uarangko nichinasa manderangko didiskagen.
Da·omitingo Khasi Jaintia Hills-o gital bikotgipa VPP-ni bilakbaroroengon, UDP-ba regional party-rangni gisepo bilakgipa aro tangbanggipa ong·skaenga.
KHADC aro JHADC poll-rangko kamrangkode ka·soengaha ine aganengon, “UDP bang·gija somoirangna skang mangmangosan, party-ni MLA-rang aro MDC-rang baksa dingtang dake Jaintia Hills-ni dilgiparang baksa September 6 tariko agangrikangaha aro Khasi Hills-ni MLA-rang, MDC-rang aro dilgiparang baksaba chinga agangrikaha” ine party dilgipa saksa aganaha.
Ua indakeba aganaha je UDP, Meghalaya-ni gitchambatsranggipa aro dal·batsranggipa regional party ong·a aro da·ode UDP-o memborrang bang·asa bang·batoroaha, jeon KHADC aro JHADC-o MLA sak 12 aro MDC sak 17 donga.
“Assembly aro district council-oba joltangtangni representative-rang kraa gitan donga, jeni ortoan UDP ia Khasi aro Jaintia Hills region-o bilakenga ine ma·sina man·a indake da·oni bilo pangchake UDP, re·baenggipa MDC poll-rango nambate dakna man·gen ine ka·dongsoenga,” ua aganaha.
KHADC aro JHADC-o, UDP kim·kimaniko on·enba mongsonggipa kamkon ka·enga aro KHADC-o UDP dilgiparangni dilanio batanggimin bilsibrio executive committee-ko rikna man·aha, rikna man·asan ong·ja Land Bill, Clan Bill, Waste Management ba building laws dakgipa bang·a mongsonggipa bill-rangko ra·gatna man·aha, party dilgipa aganaha.
Indake ong·oba ia bilsiode namen rasong griani ong·jok, maina chingni bilko bon·ataha, ua agandapaha.
“KHADC executive committee-ni batanggimin itihasrangko na·a niatgenchimode, uamang jadok, basakobade jagittam, bilsisa ba bilsigni baiaia indiba chingni dilaniode bilsi brina batpile baijok, uni ortode UDP dilgiparango rikdilna changani gnang,” ua aganaha.
Voice of the People Party (VPP) gita dakgipa dolni political-ni a·baona napbaani bidingo aganengon, “uamang ding·chaoengasan ong·aia indiba chingni kam ka·ani aro KHADC aro JHADC-o bilakani aro on·kange kam ka·anirangchi chinga manderangko didiatgen aro Khasi aro Jaintia Hills-ni manderangni chakpaaniko man·gen,” party dilgipa aganaha.
Indake ong·genchimoba, “Chinga darang regional party-rangkoba onchepe ra·ja indiba chinga gitchambatsranggipa aro dal·batsranggipa regional party ong·enba party-ko bilakdapatna re·chakatgen aro Khasi aro Jaintia Hills-o manderangni chakpaaniko man·na jotton ka·gen” ineba aganaha.
Indakeba nikna man·a je, a·dokni regional party-rangko bon·attokgen aro ru·utgijan uamangni biaprangko chinga ra·skagen VPP ku·watahachim.