U·IATTIMGIPAONI
TURA: Garo Hills-oni Assam-ona dakanggipa Agia-Medhipara-Phulbari-Tura (AMPT) ramako taridapanirang namsrangjani gimin A·chik Youth Movement for Better Society (AYMBS) suk ong·gijaniko parakattaiaha.
AYMBS-ni parakatani gitade, ia AMPT ramani bang·bata bakrang, mongsongbate Chibinang-oni Nidanpur-ona dakanggipa bakko sikkelesa taria gita nikna man·enga aro ia ramani bakrang, adita mikkarang waani ja·manon nosto ong·na gita a·bachengahachim.
Phulbari-Dhubri dolongko da·o rikengani gimin ia AMPT rama gitan dal·dalgipa garirang re·ruratokengaha aro iani a·sel ia ramani obostarang namjabatroroangengaha ineba AYMBS parakataha.
“AMPT ramani nosto ong·roroangenganiko official-rang ta·raken niatna nangchongmota. Ia rama gita bosturangko nangana bate salengani a·sel aro maming taridapani dongjani a·sel obostarang namjabatroroangengaha. Ramarango a·kol dakgiparangko uamang cement block-rangchi taridapnade jotton ka·engachim indiba bostu salruragipa garirangni re·ruraaniko champengkujaskalde ia pilakan apsanaigen,” ine AYMBS-ni president Peterjob A Sangma parakataha.
Nosto ong·gipa ramani bakrangko block-rangchi andape tarina jotton ka·ahachim indiba ia block-rang da·o gimaengahani a·sel batesa gari gorarang aro ja·achi re·ruraenggipa manderangba neng·nikanirangko chagrongna nangtokengaha ine AYMBS parakataha.
