U·IATTIMGIPAONI
TURA: Mongolbar salo, Meghalaya Samachik Association (MSA)-ni dilgiparang, Garo Hills Autonomous District Council (GHADC)-ni Secretary-ko grongenba, GHADC (Protection & Promotion of Garo Traditional Medicine) Rules, Bill 2019-ko pass ka·na gita kamrangko ta·rakbatatchina didiangaha.
Ia Bill-ko pass ka·china gita MSA, 2012 bilsionin dabiengachim ine nikna man·a.
Ia draft bill-ko 2019 bilsion GHADC-na on·manaha aro ia apsankon da·o Meghalaya sorkarini Commissioner & Secretary-naba watatgen ine MSA-ni dilgiparang parakataha.
Draft bill-ko GHADC-oni Deputy Secretary W Rapthap-ona watatani ja·man draft bill-ko name taridapenba on·pilchina gita GHADC-ona watatpilahachim ine janapatengon, “Iani bidingo chinga changni chang General Administration Department-o sing·doatahachim indiba iani file office-oni gimaenga inesa chingna aganatrongaiaha. Ia bill-ko Meghalaya sorkari jabrini ja·man on·atpilahachim indiba unonin ia bill-ko GHADC-o bon·chipatengkua,” ine MSA parakataha.
Indake ong·engon, iani bidingo ta·raken nanga gita ja·kurangko de·china aro taridapna nanganirang donggenchimode taridapenba nangchakegipa department-ona watatchina ine MSA, GHADC-ni dilgiparangko didiataha.
