‘Mongsonggipa kattarangko sing·na bilongen bakandikgipa somoiko on·a’
U·IATTIMGIPAONI
SHILLONG, Sep 15: Mija Sukrobar salomangmang Meghalaya Autumn Assembly session-ko a·bachengatgipako somoi ra·dapchina Voice of the People Party (VPP) amendment motion-ko ja·ku de·aha.
Ia session ong·enggipana somoi on·gipa baksa ua namen kusi ong·ja ine amendment motion-ko ga·anganio VPP MLA, Adelbert Nongrum aganaha.
Uni parakatani gitade, jensalo sorkari assembly session-ko bilsio changgnimangmang dakna gimikko ku·monga, chamgipa sal 5 working day-mangmangde bilongen bakandikgipa ong·a.
Private business-na salgnimangmang chama ian chu·onggipa ong·ja jeon a·dokni nanganirangna dingtang dingtang chanchina nangannirang dongachim ine ua aganaha.
A·song gimiko gamjin aro poraiani gadango national index-ni gita a·dok komibatgipa gadango ong·enga ine VPP MLA gamchatgipa kattarangko ra·e aganaha.
Adita sinjetani neng·nikaniko man·enggipa jean a·dok sorkarini gita chagrongenga, pekgipa sam drugs-rangko badingsrukgipa, NEP-ni bidingo chatro chatrirangna chanchina, poraia man·gipa chadambe gimik grapenggiparangna, MBBS-ni a·dok quater seat-na kam ka·a tik ong·gipana, East Jaintia Hills-na environmental public hearing-ko on·a jechaka, manderangni jegalani aro police bang·e jak jakkalani, Them Metor (Harijan Colony)-ni bidingo kam ka·angani aro Shillong Cherry Blossom Festival-na tangka paisa chamanganina sing·anirang donga ine Nongrum agandapangaha.
“Ia gamchatgipa neng·nikanirangni bidingo aganna chingo bilongen bakandikgipa somoiko man·aha jean a·dok baksa ramram manderangko ia sal 5-mangmang house-o chanchirimna namen bakandikgipa somoi ong·ani gimin neng·nikata. Maina indakpile session-ko kan·dikatna champenganiko dakna jotton ka·enga? Maia dakgipa agenda donga? Kan·dikgipa assembly session-ko daka ian democracy-ko so·otgipana bate komija,” ine ua aganaha.
Ia agangrikanio bak ra·enggipa membor-rangchi gisiko nangani ba namnike ra·bagipao sing·anganiko ra·chakna ia da·o ong·enggipako Business Advisory Committee-ona ra·angpilna somoiko chamani report-na ua aganaha.
Nongkrem-oni VPP MLA Ardent Miller Basaiawmoit jean amemndment motion-na chakpaanio bak ra·e aganaha, uamang maiko ma·sina iako tariaha jeon sorkario maming badingchiwalani dongjaonin session-ko sal 5 ong·atsan tik ka·aha.
“Opposition membor ong·e an·ching ma·sia, a·dokni aro manderangni nangnikani gamchatgipa bang·a kattarangko sing·na ian an·chingna bilongen bakandikgipa somoi ong·aha. Treasury bench-oni bang·bata membor-rang assembly tom·angannio gisiko nangbate bakko ra·angaha. Uni gimin, ian bang·a gamchatgipa neng·nikanirangna sing·na kattako sandina opposition side-oni membor-rangna bilongen neng·gipa kam ong·aha,” ine ua aganaha.
September 19 tariko ong·atna am·enggipa session-na ming 60 sing·anirang donga ine Nongkrem-oni VPP MLA aganaha.