U·IATTIMGIPAONI
SHILLONG: Assam-Meghalaya sima ariko tik ka·grikna bangki dongenggipa kamrangni bidingo Nongkrem MLA, Ardent Miller Basaiawmoit-ni sing·anina aganchakengon, re·anggipa somoio Assam Chief Minister Himanta Biswa Sharma aro Karbi Anglong Autonomous Council-ni Chief Executive Member-ni, Shillongona mingsa tom·aniona re·bamiting somoio aganangaha je da·o re·baenggipa October jani skanggipa ba gnigipa antio Khanduliona re·ange nina gita ku·chakangaha ine Chief Minister Conrad Sangma House-oa aganchakaha.
“Uamangni agangrikani beben official-de ong·ja indiba agangrikani namen gamchatgipa ong·aha, jensomoio chinga Khandulio gronggrikgen aro sepangjolni biaprangkoba nirokegen, uni ja·mano nigrike kamrangko ka·gen,” Pa Sangma parakaha.
Assam-Meghalaya sima ariogipa obostarangni bidingo Karbi Students Association-ni agangipa kattarangni bidingo Assembly zero hour-o chanchirimanio Nongkrem MLA iani bidingo janapahachim.
Association indake aganahachim je, “Chingni a·arangko gimaatode obostarang Manipur-o gita ong·gen,” uamangni indake agangipa kattarangara a·dokni tom·tome ku·mong melie donganio neng·nikaniko ra·bagen ine MLA aganaha.
Niam aro ain-ko kim·kime rakkina gita chel·chakgipa dolrang, indakgipa kajia golmal gnanggipa biaprango simsak-mikrake dongenga ine Chief Minister aganchakaha.
“Ia biaprango, chel·chakgipa dolrang mikraken nitimenga aro re·roroe nirokanirangkoba dakenga,” CM aganaha.
Indake re·anggipa somoio, Assam Cabinet minister aro Regional Committee Chairman Piyush Hazarika-ni, Meghalaya Deputy Chief Minister aro Regional Committee Chairman Sniawbhalang Dhar baksa Khanduli-ona re·ange sima arini bidingo agangrikaniko dakeani ja·mansa, Karbi Students Association indakgipa kattarangko aganaha ine CM dokbadale aganaha.
Uni ja·mano, iandakgipa kattarangko ku·watgenchimode sima ario tom·tome meli-nangrime donganio neng·nikaniko ra·bagen ine Assam cabinet minister, Association-ni kattana aganchakatahachim.
Sima ario kajia golmal ong·anirangko nirokna gita gital kuligipa damsni border outpost-rang namen kamrangko ka·enga ineba CM aganaha.
Iandakgipa sima arini kajia golmalrangde, a·dokna gitalgipa kobor ong·ja, indiba da·oni sorkari ia pilakrangko namatna raken kam ka·enga, Chief Minister aganaha.
