SHILLONG: A·dokni Assembly autumn session-ko kan·dike ong·atanina Opposition dolrang session-ko matchotdrakatanina a·dok sorkariko matnange sal 5-na ong·atgipade maming saloba indake ong·ata dongkuja uni gimin komibeoba assembly-ni session-ko sal 8 ba sal 10 ong·atna nanga ine aganangaha.
Assembly, autumn session-ni a·bachengaoni matchotaona ong·atako Opposition dolrang chu·ongnikangjaha.
Nirike nianio maiko a·bachengataha, jeon nangarangko agan-talate on·angna dongimin sal chu·ongsrangja aro agangrikanirangko kragijagipa bewalo drae matchotdrakataha.
“Ia kan·dikgipa sal somoiko on·ani gisepo sorkari rikengipa aro opposition dolrangoni membor-rang manderangni namgnina dingtangmancha jemangan sorkarini gisiko nangatako nangenga aro nangchongmotgipa neng·nikanirango sorkariko mikrakatna opposition jotton ka·anganirang jekon mikkangchakao done kamrangko ka·angna nangengachim uarangko sing·angna chol on·ako kraa bewalo jakkalangna jotton ka·angaha,” ine TMC parliamentary party-ni dilgipa Mukul Sangma aganaha.
Adita nanga ja·kurangko de·angna ra·baaha aro mitam mamla-rango chanchirake aganchakangaha, nangarangko ra·chakjana sing·doangaha aro nangchongmotgipa koborrangko mang·angna bi·angaha, ine ua aganaha.
“Jensomoio an·chingo ding·chaoenggipa neng·nikanirang dongengon maidake ia kan·dikgipa sal somoio pilak nangarangko sing·angna man·gen ine ka·dongaha, chinga namen iako chu·ongnikja,” ine North Shillong constituency-oni MLA VPP-ni dilgipa Adelbert Nongrum aganaha.
“Mikkangchi dingtanggipa dakgipa ong·na hai ka·dongsona,” ine ua agandapangaha.
“Session-o chanchina sal 5-kosan an·ching man·aha aro bang·a chanchina nanganirang dongachim jeon an·ching ra·bana nangnika aro bang·a sing·anirangan aganchakani gri ong·aiaha. Gimikko nigopatode angade ong·e nikaia,” ine Nongstoin constituency-oni Congress MLA, Gabriel Wahlang aganaha.
“Mikkangchi sorkari badingchiwalanina bang·bata salrangko man·angna anga namnikchongmota aro private membor-rangnaba bang·bata salarangna man·angna ka·dongsoenga jedakode an·chingba dingtang dingtang a·barango an·tangtangni chanchianiko agan-talatangna man·gen,” ine ua agandapangaha.
“Chinga opposition dolchipakni gita chinga chanchia bang·bata salrangko on·a nangachim maina bang·a neng·nikanirangna chanchina nanganirang dongachim aro iarangna chinga sing·anirangkoba tariaha aro sing·ani somoio ming 15 ba 20 dake sing·na tarie donahachim aro uni gisepon sing·anirangna jenten kontasani gisepo mingsa minggni sing·anirangkosan dakna man·aiaha,” ine Umsning constituency-oni Congress MLA, Dr Celestine Lyngdoh aganaha.
“Mikkangchina iana bate komibeoba sal 10 ba sal 8 somoi salrangko man·angna ka·dongsoenga indiba sal 5-de ong·ja maina sal 5-o skanggipa sal gita mamingkon dakrikna man·ja. A·bachenggipamangmango aro sal 4-oni salgnimangmang private membor business-na salko man·aia. Ia session baksa anga namen chu·ongnikja,” ine ua agandapangaha.
