U·IATTIMGIPAONI
TURA: South West Garo Hills a·jao niam gri bol rate badinggipa mande sakgittamko Ampati-ni NGO-rang rim·ani ja·man, ia manderangni kosako Damalgre Police Station-o FIR ka·doangaha.
South West Garo Hills a·jani NGO-rang, chong·motan UGPF, AAYF, FAF, AAPE aro FKJGP dolrangni parakatani gitade, sakgittam manderang, chong·motan Teldhala songni Sona Khan, Rerapara songni Techang Ch Sangma aro Rerapara songni Sengkrang Ch Marak-ko AS-17C 3645 gario, niam gri ratgimin bolrang baksa, Sombar walni 7:00 bajimango Wakantagre Akakigre songo rim·enba, iani bidingo Damalgre police station aro Forest department-naba u·iatahachim. Indake ong·genchimoba ja·mano ia NGO-ni dilgiparang, re·ange nion, ia manderang, an·tangtangni gari baksa ua biaponi gimaaha.
“Uni gimin ia manderangni kosako rakgipa ja·kurangko de·china chinga na·simangko mol·molenga,” ine NGO-rang, Damalgre police station-na FIR ka·doanggipa chittio parakataha.
