U·IATTIMGIPAONI
TURA: Songni nokni me·chikrangna janggi tangani cholrangko on·na gita re·anggipa September 14 tarikoni September 28 tarikona, West Garo Hills District Sericulture Office-ni gita Meghalaya State Skill Development Society (MSSDS)-ni dakchakanichi, muga kilding tariani bidingo skie on·na gita sal 14-ni training program-ko Baljek Agal-o ong·atangaha.
Ia training program-ko ong·atanio Baljek Agal aro uni wilwilao donggipa dingtang dingtang songrangoni gimik sak 40 me·chikrang skie ra·angaha.
Ia training program-ko matchotatani salo, West Garo Hills a·jani Additional Deputy Commissioner Mary Lisa K Marak, mongsonggipa sokgipa ong·e bakko ra·angenba, training-o skie ra·gipa me·chikrangna certificate-rangko suale on·angaha.
Ia tom·anio ua jinmana aganprakangengon, ia training-o donge skie ra·ahani gimin an·tangni kusi ong·chakaniko parakangenba, mikkangchi ku·cholsan nangrime kamko ka·china gita ku·pattianiko on·angaha. Jengjal jolrango man·gipa Muga kildingni gimin gipin biaprangoba mingsing minggamengaha ine janapatengon, an·tangtangni skie ra·gimin changa sapanirangko jakkale kamko ka·angkuode ia jolrang mikkangchi a·song gimikon niksenggipa ong·angkugen ine Marak parakataha.
